Клуч на врата на факултетот за бизнис и економија. По направена контрола во приватната високообразовна институција, утврдени се еден куп неправилности. Министерството за образование и наука по завршување на локалните избори ќе продолжи со контроли во високообразовните установи, најавиресорната министерка Весна Јаневска. Таа за затворањето на приватната висока стручна школа – Факултет за бизнис економија во Скопје, рече дека увидот покажал неправилности.
- МОН формираше комисии кои прават увид во работењето на високообразовните институции, со цел подигање на квалитетот на високото образование. Направен е увид и во оваа институција, каде се утврдени бројни неправилности, од кадар, опременост. Им дадовме еден месец рок да ги поправат тие неправилности, но, бидејќи воопшто не изреагираа, а дополнително ги изгубија и просторните можности, се обративме до Агенцијата за квалитет во високо образование, која потврди дека овој т.н факултет е нефункционален. Според законот, ние вчера издадовме решение за привремен престанок на работа на оваа високо образовна установа – појасни Јаневска.
Таа посочи дека досега се затворени 14 приватни научни институти, а ова е првата високо образовна приватна установа која нема повеќе да работи.
- Се надевам дека по урнекот на приватните универзитети и дел од високо образовните установи кои навистина не ги исполнуваа условите, самите ќе пристапат кон процес на затворање, ако не ние ќе ги затвориме – изјави Јаневска.
МОН информираше дека поради констатирани нерегуларности во работењето и непостапување по задолжение за нивно отстранување била донесена одлука за привремено запирање на работата на приватната висока стручна школа – Факултет за бизнис економија во Скопје.