На денешен ден, на 26 август 2001 година се случи чудовишното убиство на двајцата чувари на мотелот „Бриони“ недалеку од тетовското село Челопек: Светислав Трпковски (39) и Боге Илиевски (46).
Двајцата додека дежурале во ноќна смена во мотелот биле фатени, на градите им бил поставен експлозив и така биле врзани за еден од потпорните ѕидови на мотелот. Потоа бил активиран експлозивот во 6 часот и 15 минути тоа кобно утро и тие биле разнесени заедно со објектот.
Потоа нивните најблиски ги пронашле нивните распарчени тела меѓу купиштата од градежниот шут од разурнатиот објект. Убиствата се случија пет дена по разурнувањето на Лешочкиот манастир, извршено, исто така, со експлозив.
Сѐ уште остануваат непознати мотивите и извршителите на овој терористички чин врз недолжни цивили, кој се случува две седмици по потпишувањето на Охридскиот рамковен договор, со кој беше окончан воениот судир во Македонија во 2001 година. Конфликтот заврши, но сепак тие беа убиени и останува нерасветленото прашањето: од кого и зошто?