За разлика од летниот период, кога се чекаше со часови за поминување на македонско-грчката граница на пат кон морските дестинации кај јужниот сосед, сега притисокот на граничните премини го прават возачи од Грција во потрага по поевтино гориво во Македонија, според написот на грчки „Д њуз“.
„Со оглед на тоа што цените на горивата сега ги прават луксузна ставка, стотици граѓани и професионалци во пограничните префектури бараат поекономични начини да ги наполнат своите резервоари. Затоа, не се малку оние што патуваат во Бугарија и во Северна Македонија, бидејќи цените на горивата во соседните земји се на ниско ниво. Поточно, во Северна Македонија цената на безоловниот бензин од 95 октани е 1,61 евро за литар, а дизелот 1,70.
Соодветно на тоа, во Бугарија просечната цена на обичниот безоловен бензин е 1,70 евра за литар, а дизелот е близу 1,95. Во Грција, просечната цена на безоловниот бензин достигна 2,20 евра, а дизелот е малку под 2,23. Цената на течниот нафтен гас исто така се движи нагоре.
На границата со Северна Македонија се формираат километарски редици, особено за време на викендите, бидејќи поевтините горива ги принудуваат жителите на северните префектури да мора да ја менуваат земјата за да полнат гориво без да ‘крварат’ финансиски“, пишува грчкиот медиум.