„Колосалниот неуспех“ на бугарските европратеници да го протуркаат амандманот со кој се додава „модерен“ пред „македонски јазик и идентитет“ во извештајот на Европскиот парламент за напредокот на Македонија го искористи лидерот на Преродба, Костадин Костадинов, за да побара оставка од Владата на Бугарија веднаш.
„Извештајот официјално ги признава илјадагодишниот македонски идентитет, јазик и култура, а на сметка на тоа го отфрла присуството на какви било Бугари во Македонија. Исто така, во извештајот не се споменува ниту збор за репресија врз Бугарите во Македонија.
Честитки до сите бугарски евроатлантски јаничари чиј сон за убивање на Бугарија и на бугарскиот народ продолжува да се остварува. Честитки до владата на ГЕРБ, ДПС, БСП, ИТН, која не отвори уста да каже ниту збор за заштита на Бугарите во Македонија. Честитки до нашите сојузници од Европската унија, кои покажаа дека со вакви сојузници не ни требаат непријатели. Честитки до сите бугарски наивници кои чекаа некој друг да ни помогне, а на крајот се случи европратениците на Орбан експлицитно да се изјаснат против сите бугарски измени во извештајот, благодарение на кои тие беа одбиени.
Поради овој колосален неуспех, владата на ГЕРБ-ДПС-БСП-ИТН треба веднаш да поднесе ОСТАВКА!“, побара Костадинов на Фејсбук.