СВР Штип поднесе кривична пријава против три лица од Штип, осомничени дека со лажни извештаи незаконски наплатувале услуги за лична асистенција на лица со попреченост.
„Секторот за внатрешни работи Штип до Основното јавно обвинителство Штип поднесе кривична пријава против Н.Џ. (50), Ѓ.Ј. (57) и Е.Џ. (44), сите од Штип, поради постоење основано сомнение дека сториле продолжено кривично дело „злоупотреба на службена положба и овластување“, продолжено кривично дело „фалсификување или уништување деловни книги“ и продолжено кривично дело „употреба на исправа со невистинита содржина“ велат од МВР.
Според полицијата, во периодот од 2022 до 2024 година, тие како ангажирани асистенти преку Црвениот крст не ги извршувале услугите во целост, но прикажувале дека ги реализирале сите работни часови.
„Со намера да се стекнат со противправна имотна корист, тие ја злоупотребиле службената положба и овластувањата, така што кај седум лица со попреченост – корисници на услугата лична асистенција од подрачјето на Штип, Свети Николе и Кочани нередовно ги извршувале задолжителните услуги согласно неделните и месечните планови. Иако услугите не биле извршувани во целост, пријавените изготвувале месечни извештаи со невистинити податоци за бројот на реализирани работни часови. Таквите планови и извештаи ги доставувале до Црвен крст, Општинска организација Неготино, од каде биле фактурирани до одговорните лица во ЈУМЦСР Штип и Министерството за социјална политика, демографија и млади“ стои во соопштението на МВР.
Со доставување невистинити месечни извештаи биле фактурирани средства кон надлежните институции, со што е предизвикана штета од 415.013 денари на буџетот на Министерството за социјална политика, демографија и млади.
„Со ваквите дејствија, првопријавениот се стекнал со противправна имотна корист од 162.120 денари, при што е предизвикана штета од 218.716 денари. Второпријавениот се стекнал со 129.966 денари, а предизвикал штета од 175.775 денари. Третопријавената се стекнала со 15.252 денари, при што предизвикала штета од 20.522 денари“ соопштија од МВР.