Изет Меџити, кандидат за градоначалник на Општина Чаир, го објави името на носителот на советничката листа за локалните избори, д-р Мухамед Муртези, соопшти тимот на Меџити.
„Денес сакам да го претставам носителот на листата на советници на ВРЕДИ за Општина Чаир, докторот, интелектуалецот, активист на граѓанското општество и човек со високи вредности, Мухамед Муртези. Заедно кон големата победа. Само за тебе Чаир“, напиша Меџити.
Кој е Мухамед Муртези ?
Роден и израснат во Скопје, Муртези дипломирал на Медицинскиот факултет при Универзитетот во Приштина, а магистрирал на Филозофскиот факултет при Универзитетот „Св. Кирил и Методиј“ во Скопје, на насоката „Европски студии за интеграција“. Од 1991 година е активен во граѓанскиот сектор, каде бил претседател на Сојузот на исламска младина, Здружението на албански издавачи и Центарот за разбирање и институционална соработка. Исто така, бил главен уредник на едукативно-културното списание ВЕПРА и на меѓународното научно списание CENTRUM, како и коосновач и директор на издавачката куќа „Фуркан ИСМ“.
На локалните избори во октомври, Муртези за првпат се вклучува во политичка дејност како носител на советничката листа на ВРЕДИ за Општина Чаир и кандидат за претседател на Советот. Неговата цел е да даде позитивен придонес и да остави траен позитивен белег во оваа сфера.
„Нашата визија, заедно со идниот градоначалник на Чаир, Изет Меџити, е еден поубав, почист и побезбеден Чаир. Поквалитетно образование и наука, поразвиена култура и спорт, подобар и подостоинствен живот. Затоа што жителите на Чаир го заслужуваат тоа и јас верувам дека ова е остварливо со добра волја, голема посветеност и чесна работа. Затоа ја бараме вашата поддршка на 19 октомври. За нашиот Чаир“, изјави Муртези.