Локалните избори од 19 октомври во Македонија го надминаа значењето на општинска трка, претворајќи се во референдум за промени и политички легитимитет во албанскиот табор, изјави Изет Меџити, еден од лидерите на коалицијата ВРЕДИ.
„Нормално е што заедно со граѓаните славевме до утринските часови. Тоа е голема победа, особено на овие избори кои не беа само локални избори, туку многу повеќе, тие беа битка за легитимитет, еден вид референдум“, изјави Меџити во „Ора њуз“.
Тој нагласи дека Чаир и Тетово беа епицентрите на овој политички референдум.
„Вниманието беше насочено токму кон Чаир и Тетово. Во Чаир завршивме во првиот круг, додека во Тетово сме во убедливо водство со над 4 илјади гласови, недостижна разлика за ДУИ и албанската опозиција“, додаде тој.
Според Меџити, оваа победа ја потврдува јасната волја на граѓаните за промени, трансформирајќи ја коалицијата ВРЕДИ во новата претставничка сила на Албанците во Македонија.