Министерот за здравство Сашо Клековски учествува на 76. седница на Регионалниот комитет на Светската здравствена организација за Европа, која се одржува во Копенхаген.
На седницата министрите за здравство од европскиот регион разгледуваа повеќе извештаи и предлози за идната работа на СЗО, а свои програми претставија и шестемината кандидати за нов генерален директор на организацијата.
Во своето обраќање министерот Клековски истакна дека предизвиците со кои се соочува Македонија се заеднички за целиот регион – демографските промени, стареењето на населението, растечкиот товар на незаразните болести и одливот на здравствени кадри.
„Вложувањето во здравството е инвестиција во економскиот и социјалниот развој. Затоа, дигиталната трансформација е еден од нашите најважни национални приоритети. Сакаме поповрзан, поефикасен и потранспарентен здравствен систем“, изјави министерот Клековски.
Тој нагласи дека подеднакво важно е зајакнувањето на примарната здравствена заштита, со акцент на превенција и рано откривање на незаразните болести, вклучително и канцерогените заболувања.
Во делот на превенцијата, Министерството ја засилува забраната за пушење и подготвува мерки за засладените пијалаци.
Меѓу другите приоритети министерот ги посочи и подобриот пристап до лекови, финансиската заштита на пациентите, модернизацијата на законската регулатива и одржливото финансирање на здравството.
Клековски се заблагодари на Светската здравствена организација, особено на Канцеларијата на СЗО во Скопје, за континуираната техничка поддршка и партнерството во реформите на здравствениот систем.