Лидерот на ВМРО-ДПМНЕ, Христијан Мицкоски, од завршниот митинг во Брвеница повика на вонредните локални избори в недела за нов градоначалник да се гласа за Стојанчо Радичевски, „за да не ни се случи повторно СДС“.
„Изборот на овие избори за Брвеница е помеѓу сигурна иднина за сите граѓани, и избор со кој Брвеница ќе се подели. Вчера тука беше Венко Филипче. Немаа програма, немаа дела кои ги понудија, но имаа навреди, омаловажувања, арогантен однос. Кажаа некаков проект освен тоа што видовме неартикулирано викање, беседење и исплашени луѓе на бина. Тоа се луѓе за кои е докажано дека се печалбари во политиката. Луѓе кои живеат од народот, а не за народот.
Сакам да ви кажам дека изборите во Брвеница се и порака за тоа во каква држава сакате да живееме. Онаа полна со навреди, криминал, подметнувања и свиткана кичма каква ја сакаат нашите противници. Или Македонија во која ќе се бориме за секој човек, исправени и горди“, порача Мицкоски пред насобраните граѓани.
„Излезете масовно на избори. Разликата е видлива и голема. Излезете затоа што Брвеница е и ќе остане нашиот заеднички дом. Брвеница е една, а силата да оди напред ја има во сите вас, во луѓето што живеат овде! Да ја сочуваме силата на единството, да ја градиме иднината со достоинство!
Во недела излезете масовно и гласајте за Стојанчо Радичевски за да не дозволиме повторно да ни се случи СДС, масовно да го заокружиме бројот 1 и да им докажеме дека помниме и дека никогаш нема да дозволиме повторно тие да ни се случат!“, рече претседателот на Владата и на владејачката партија.