Министерот за надворешни работи и надворешна трговија, Тимчо Муцунски, ги отфрли критиките дека Владата не спроведува европски реформи, оценувајќи дека напредокот не се мери со субјективни изјави, туку со мерливи факти и резултати.
Реагирајќи на изјавите на европратеникот Томас Вајц дека во последната година во Македонија не се гледа никаков напредок, Муцунски истакна дека земјата во изминатиот период добила 75 милиони евра од фондот на Планот за раст на ЕУ.
„Ако не сме спроведувале реформи, немало да ги добиеме тие средства. Три држави од регионот – Србија, Босна и Херцеговина и Косово – не добиле ниту еден цент од Планот за раст, бидејќи не спроведувале реформи“, рече Муцунски во интервју за ТВ Сител.
Тој изрази очекување дека во новиот извештаен период, кој треба да биде објавен во наредните денови, Македонија ќе добие висока оценка за спроведените реформи и уште една транша од околу 70 милиони евра.
„Времето ќе покаже кој ја кажувал вистината“, додаде Муцунски.
Спорно е времето на објавување на интервјуто
Европратеникот Томас Вајц, пак, на ТВ Канал 5 изјави дека е изненаден од моментот на објавување на неговото интервју за „Еуроњуз Бугарија“. Интервјуто било дадено на 10 март во Стразбур, а објавено дури на 26 април – повеќе од седум недели подоцна.
„Мислам дека не е многу професионално. Бев малку изненаден што е објавено пред неколку дена. Но, за жал, изгледа дека има некаква агенда зад тоа“, оцени Вајц.
Вајц: Македонија бележи напредок, интервјуто за бугарска ТВ е старо