„Мора или да си будала, или воопшто не си будала, туку работиш само за личен интерес, ако веруваш дека ќе нѐ направи Норвешка и ќе изврши големи промени во следната 22-ра година од своето владеење партијата, која веќе владеела 21 година без да постигне ништо, без да изгради автопати, канализација, водовод, училишта, градинки, без да го реши нашиот политички статус на уставен и системски начин, која исклучиво се занимавала со збогатувањето на членовите на нејзиното раководство!“ – оваа објава на фејсбук на политичкиот аналитичар Бесим Небиу ја пренесе весникот на албански јазик „Лајм“ во информација под наслов „„Небиу: Партија која во текот на 21 година само ги богатела членовите на своите семејства не може да направи промени““.
Небиу не прецизира на која партија се однесува неговата објава, но според содржината на критиката, што ја изнесува, сосема е јасно дека тој посочува, иако индиректно, на Демократската унија за интеграција и нејзините челници, бидејќи единствено тие беа во изминативе две децении дел од власта во Република Македонија, покрај другите партии, кои се менуваа.