„ДУИ, партијата што владееше со секоја пора од институционалниот живот две децении, денес го избра молчењето и избегнувањето на одговорноста како единствена форма на комуникација. ДУИ, која повеќе од 20 години беше вистинската моќ на Албанците, денес не успева да артикулира ниеден став, ниту самокритика и не е во состојба да создаде нова визија. Молчењето и нереформирањето на ДУИ создава празнина на теренот и политички вакуум. Но, во политиката празнината никогаш не останува празна. Се отвора терен за нова опозиција и во таквите ситуации секогаш се појавуваат нови алтернативи.“ – пишува политичкиот аналитичар Флоријан Несими од Тетово во својата колумна со наслов „Распаѓањето на ДУИ започна кога ги отстрани интелектуалците и го забрани критичкото мислење“, која ја објави весникот на албански јазик „Лајм“ од Скопје.
Несими пишува: Ниеден пратеник, ниту еден поранешен функционер или кој било член на раководството на оваа партија не дал барем едно критичко мислење за јавноста. Ова молчење од личности, кои со години држеле клучни позиции, покажува дека недостасува внатрешна дебата и политичка храброст во оваа партија. Целата оваа ситуација е трагична бидејќи зборува за недостатокот на интелектуалци во оваа политичка структура. Додека беа на власт, нејзините лидери систематски ги исфрлија сите интелектуалци, критичари и луѓе со професионално размислување, со што создадоа затворена и целосно некомпетентна структура. Партијата, која ги исфрли својот интелектуален капацитет, повеќе нема механизми, ниту потребна култура за да се реформира.
Денес ДУИ страда, поради тоа што беше модел изграден во текот на 22 години, каде што никогаш не се негувале различни мислења, додека внатрешната дебата е заменета со слепа лојалност кон претседателот. ДУИ денес молчи, затоа што нема што да каже, но туку молчи и поради тоа што нема кој да зборува.Сите главни личности на оваа партија се политички исцрпени и без перспектива, но тие продолжуваат да остануваат на политичката сцена, поради нивната лојалност кон претседателот. Оваа партија целосно не успеа да создаде нови професионални кадри и луѓето сè уште се промовираат таму врз основа на лојалност, а не на знаење.
Реформите во оваа партија никогаш нема да се случат поради одбивањето да се прифати поразот на последните избори. Ако партијата го прифати поразот на изборите, тогаш ќе следат анализа на резултатите, внатрешна дебата, прифаќање на пораката на гласачот, а потоа ќе следат оставки и формирање на нов лидерски тим. Неуспехот во реформирањето и недостатокот на нов политички концепт укажуваат дека загубите ќе продолжат и на следните избори. Ова е затоа што во политиката сè што паѓа не може повторно да се издигне.