„Република Албанија е наш сосед, регионален партнер во НАТО и сојузник, а односите и соработките меѓу двете земји се засновани на взаемна доверба, почит и посветеност за реализирање на стратешките цели на двете држави во рамки на процесот на евроинтеграција“ истакна денеска министерот за надворешни работи и надворешна трговија, Тимчо Муцунски на отворањето на Генералниот конзулат на Албанија во Струга со албанскиот министер за надворешни работи Игли Хасани.
На настанот присуствуваа и првиот вицепремиер и министер за животна средина Изет Меџити, заменик министерот за правда Ален Деребан, пратеници…
Отворањето на Генералниот конзулат во градот на поезијата, според Муцунски, нема да претставува само институционално присуство, туку ќе биде и силен мост на комуникација меѓу, како што рече, две пријателски и соседни држави и симбол на блискост, заемно разбирање и соработка.
„Историски ден за Албанците во С. Македонија! Денес, Струга не е само град на езера и поезија, туку стана и град на албанската дипломатија, честиташе денеска лидерот на Алијанса за Албанците, Арбен Таравари по повод денешното отворање на Генералниот конзулат на Република Албанија во овој град.
„…долгоочекуван чекор за да бидеме поблиску до албанските граѓани од оваа страна на границата. Ние, како Алијанса за Албанците, го поздравуваме овој важен чекор и го сметаме за политичка волја за зајакнување на нашите историски, културни и национални врски со Албанија, но и како конкретно олеснување за илјадници граѓани на кои им се потребни конзуларни услуги без да мора да патуваат на долги растојанија. Честитки, напиша на Фејсбук Таравари.
