Трет голем пожар избувна попладнево во Штипско. Овој пат пожарот е во близина на Штипската млекара, поради што се евакуирани вработените од фабриката „Албатрос“.
Според објавите на Фејсбук-страницата „Секојдневнието во Штип“, десетици луѓе бегале низ чадот, а многумина носеле маски на лицето. Страницата го опиша денот како „пеколен“ за Штипјани.
Директорот на Дирекцијата за заштита и спасување, Фарух Ангелов, ја потврди веста и изјави дека пожарот набрзо ќе биде изгасен.
Пожар во Пробиштипско
Во исто време, три авиони „ер трактор“ гасат голем пожар во Пробиштипско, во регионот меѓу селата Бучиште, Неокази и Петршино. Според Ангелов, пожарот во Бучиште е локализиран, но еден дел се префрлил кон селото Ратавица. Во пожарот изгорела една куќа.
Центарот за управување со кризи (ЦУК) соопшти дека до 13 часот денеска имало три активни пожари на отворено: кај Неокази (Пробиштипско), кај Исар во Штип и во село Новоселани (Општина Чешиново-Облешево).
Пожарот кај Исарот бил опасно близо до куќите, но по интервенција на еден „ер трактор“ опасноста за населбите е отстранета.
Поради густ чад во Пробиштипско, имало намалена видливост на регионалниот пат, што резултирало и со сообраќајна несреќа.