Пратеникот Бране Петрушевски во гостување на ТВ Телма изрази разбирање за револтот на јавноста од одредениот домашен притвор за бегалецот од правдата и бивш вицепремиер Артан Груби.
„Го разбирам револтот на јавноста и тоа што се зборува во однос на изнесената мерка куќен притвор за Артан Груби. Меѓутоа, таа мерка не ја носи Владата, ја носи Јавното обвинителство. По предлог на Јавното обвинителство, ја носи судската власт. Со член 98 од Уставот, судската власт е независна“, изјави тој.
„Разбирам дека на граѓаните веќе им станало нормално по претходното седумгодишно владеење на СДСМ да се шетаат министри во канцелариите на јавните обвинители, да нарачуваат обвиненија. Така што, ова се истото тоа судство и обвинителство коешто има 2 проценти рејтинг против коешто јас секојдневно држам прес-конференции, а коешто е под контрола на СДСМ и ДУИ и нивните луѓе коишто ги носеа. Кога ние излеговме и баравме комплетна смена на судскиот и обвинителскиот совет, да ги разрешиме затоа што го доведоа судството до 2 проценти за да можеме да го ставиме на здрави нозе, токму СДСМ беше политичката партија којашто беше против тоа“, додаде Петрушевски.