Порталот натаму истакнува: „Отворена е истрага против поранешниот премиер, претседател на Норвешкиот Нобелов комитет и генерален секретар на Советот на Европа Торбјорн Јагланд под сомнение за тешка корупција.“, објави Ококрим – централниот орган на Норвешка за борба против економски и еколошки криминал во соопштение за медиумите доцна во понеделникот.
„Постојат разумни основи за истрага, со оглед на тоа што тој ги извршувал позициите претседател на Нобеловиот комитет и генерален секретар на Советот на Европа во периодот опфатен со објавените документи.“, рече Пол К. Лонсет, директор на Ококрим. Полицијата соопшти дека ќе испита дали Јагланд добил „некакви подароци, патувања или заеми во врска со неговата позиција“.
Натаму, бриселски „Политико“ наведува во својата статија: Адвокатот на Јагланд, Андерс Бросвет, изјави за VG дека го поздравува отворањето на истрагата. „Мирно го очекуваме исходот. Пред сè, добро е Јагланд да добие авторитативно разјаснување од Ококрим, наместо медиумите и новинарите да спроведуваат свои мали приватни истраги“, рече Бросвет.
Јагланд ужива имунитет од кривично гонење како поранешен шеф на Советот на Европа со седиште во Стразбур, водечката организација за човекови права на континентот што го надгледува Европскиот суд за човекови права. Норвешкиот министер за надворешни работи Еспен Барт Ајде изјави во вторник дека ќе побара од Советот на Европа да го одземе имунитетот на Јагланд.
Одделот за медиуми на Советот на Европа изјави за „Политико“ во соопштение дека го примил барањето и оти ќе го разгледа, додавајќи дека спровел сопствена внатрешна административна истрага за ова прашање во декември и јануари. „Успеавме да утврдиме дека Епштајн барем двапати присуствувал на настани во официјалната резиденција на генералниот секретар. Немаме индикации дека ова вклучувало службена работа на Советот на Европа со Епштајн и нема траги од овие приватни средби во официјалниот дневник на Јагланд во тоа време“, се вели во соопштението.
„Понатаму утврдивме дека во една прилика, за време на официјална посета на Њујорк во 2018 година, Јагланд престојувал во приватен објект, што според медиумските написи би можело да се поврзе со Епштајн. Утврдивме и дека во 2015 и 2018 година тој престојувал во приватен објект во Париз што медиумските извештаи го поврзуваат со Епштајн. Не пронајдовме записи што покажуваат дека тој ги посетил имотите на Епштајн во службено својство“, се додава во соопштението. – објави денес „Политико“.