По епидемијата прогласена во Гостивар поради загадената вода од градскиот водовод, можно е да се појави и жолтица како последователна последица, предупредуваат од Комисијата за заразни болести.
Од Комисијата, која е советодавно тело на министерот за здравство, велат дека будно ја следат ситуацијата со епидемијата во Гостивар и здравствената слика кај пациентите што се јавија во болниците поради стомачни тегоби. Тие посочуваат дека во актуелната ситуација не смее да има опуштање ниту кај граѓаните на Гостивар, ниту кај здравствените власти.
„Ние како Комисија алармиравме навреме да не се опушти здравствениот систем, оти можно е покрај овие цревни причинители да имаме појава и на хепатит А, но и на хепатит Е, за што нормално благовремено е известено Министерството за здравство и здравствените власти во државата“, вели д-р Жаклина Шопова, инфектолог во Комисијата за заразни болести.
Д-р Шопова објаснува дека може да има многу причинители за болеста и ваквата слика не е невообичаена кај хидрични епидемии, кога во организмот може да се најдат различни вируси и бактерии поради мешање на чиста и неисправна вода. Сепак, според неа, точниот „виновник“ кој го разболел секој пациент поединечно никогаш не може целосно да се утврди.
„Златен стандард по однос на бактериите е копрокултурата. Како што сте известени од министерот, копрокултурите засега кај сите пациенти се негативни. Што значи тоа? Да, имаме присуство и на бактерии и на вируси, но кој е виновникот? Тоа досега во светот никој не го кажал при вакви хидрични епидемии“, додава инфектологот.
Министерот за здравство Сашо Клековски вчера изјави дека Астровирус и Шигела се најчестите вируси и бактерии изолирани кај жители на Гостивар, но тие не се идентични кај сите пациенти, па затоа не може да се излезе со генерален заклучок.
Ова е петтиот ден откако е прогласена епидемија во Гостивар. Жителите и понатаму не смеат да ја користат водата од градскиот систем за никаква намена, сè додека не добијат официјално известување дека водата е исправна.
Во меѓувреме, епидемијата стивнува. Според податоците од 23 јули, во јавните здравствени установи се евидентирани 197 новопрегледани пациенти, што е намалување во однос на претходниот ден кога имало 233 прегледи. Од 14 јули заклучно со вчера, вкупно 3.865 лица побарале лекарска помош.
На 21 јули Владата прогласи кризна состојба во Гостивар за побрза координација на институциите. Во тек е хиперхлорирање на каптажата и испирање на примарната мрежа. Се очекува до крајот на неделава граѓаните да добијат техничка вода во домовите, а до крајот на наредната недела и вода за пиење.
Истовремено, Основното јавно обвинителство во Гостивар води истрага против три лица од ЈП „Комуналец“ – Гостивар за тешки дела против животната средина и природата, предизвикани со загадување на вода за пиење. Казните за ова кривично дело предвидуваат минимум четири години затвор.