Претседателката на Република Македонија, Гордана Сиљановска-Давкова, упати честитка до припадниците на влашката заедница по повод 23 мај – Националниот ден на Власите.
Во честитката, шефицата на државата го истакна древното потекло и богатото културно наследство на Власите како дел од балканските народи.
„Вие припаѓате на древната духовна лоза на балкански народи, чие историско опстојување не е врзано за моќ и граници, туку за јазикот, меморијата и свеста за посебниот влашки идентитет“, се вели во честитката.
Претседателката подвлече дека во влашкиот јазик, традиција и култура се вткаени вековната истрајност, силното чувство на припадност и духовното достоинство, кои се пренесувале низ генерациите, особено во тешките периоди на војни, страдања и преселби.
„Треба да сме горди како единствената држава во која Власите се уставен етнички ентитет, рамноправен со другите и еднаков во уживањето на индивидуалните и колективни права. Има ли поголема потврда за демократската зрелост на македонскиот политички систем, како и за инклузивноста на македонското општество кон сите заедници?“, праша Сиљановска-Давкова.
Таа додаде дека Власите со својот сеопфатен општествен придонес оставиле и продолжуваат да оставаат трајни траги на сите полиња од општествениот живот во земјава.
„Нека е честит 23 Мај, Националниот ден на Власите! Вечен да е!“, порача претседателката.