Досегашниот директор на Фондот за здравствено осигурување, Сашко Клековски, денеска официјално ја презеде функцијата министер за здравство.
Во Министерството за здравство се изврши примопредавање на должноста од досегашниот министер Азир Алиу на новиот министер Сашко Клековски.
На средбата се разговарало за досегашните проекти, тековните процеси и активностите што биле во фокусот на Министерството во изминатиот период.
Алиу, кој беше избран за министер во јуни минатата година, не откри каде точно ќе продолжи својата кариера, но увери дека ќе продолжи да придонесува за општеството. Тој најави дека ќе ја следи реализацијата на проектите што ги започнал и дека ќе биде гласен ако тие не продолжат во правилна насока.
„Секој млад денеска станува со телефонот во рака и се информира што се случува во државата. Затоа ценам дека треба да се продолжи со дигитализацијата. Јас и после оваа недела ќе вложам напори, индиректно… ќе бидам и гласен за нешто што јас длабоко верувам дека треба да се продолжи“, рече Алиу пред две недели.
Тој додаде дека не планира да се повлече од активниот живот, туку да продолжи да работи во корист на општеството.
Реконструкцијата на Владата продолжува, а со доаѓањето на Клековски се очекува нов импулс во работата на Министерството за здравство.