На свечената прослава по повод 35-годишнината од основањето на Социјалдемократскиот сојуз на Македонија, поранешниот лидер на партијата Зоран Заев се појави со значително доцнење, на самиот крај од настанот.
Заев пристигна во моментот кога Венко Филипче, актуелниот претседател на СДСМ, веќе го држеше својот свечен говор. Поранешниот премиер не го слушна обраќањето на својот наследник, туку пристигна дури кон крајот на вечерта.
На видеоснимките од настанот може да се види и чуе како Заев се извинува за доцнењето, објаснувајќи дека доаѓа директно од промоција на филм. „Извинете на доцнење сега, ама морав таму на промоција на тоj филмот“, изјавил тој.
Според присутните, дел од сопартијците биле видно изненадени од неговото доцнење. На нивните прашања зошто го немало, Заев во својот препознатлив неформален стил одговорил: „Не бе, не бе, тука сум јас, тука сум!“
На прославата од поранешната „стара гарда“ на СДСМ присуствувале само Заев и неколку негови блиски соработници – меѓу кои Бучко и Зечевиќ. Поголемиот дел од останатите поранешни истакнати членови и функционери на партијата не биле присутни, што предизвика шпекулации дека станува збор за симболичен сигнал на дистанцирање од актуелното раководство на Филипче.
СДСМ ја одбележува 35-годишнината од своето основање во услови на историски најнизок рејтинг на партијата во последните три децении.