Претседателката Гордана Сиљановска-Давкова, утре – 15 април 2026 година, среда, ќе го одликува Анастас Коцарев постхумно со Орден „Илинден – 1903 година“.
Коцарев се одликува за неговиот особен придонес во афирмирањето на самобитноста на македонскиот народ и за залагањето и активизмот за национално и социјално ослободување и создавање независна македонска држава.
Покануваме медиумски екипи во Вила Водно, Кабинет на Претседател во 11:40 часот, се вели во најавата од кабинетот на Сиљановска-Давкова.
Д-р Анастас Коцарев е роден во Охрид, 26 март 1890 а починал во Париз, Франција, 28 март 1931.
Тој е македонски деец и лекар онколог, еден од пионерите кој работел на истражување и лекување на ракот.
Соработувал со нобеловката Мари Склодовска-Кири и на проблемот на дијагностицирање и лекување на ракот со примена на радиум. Бил еден од пионерите на радиотерапијата и радиографијата.
Д-р Коцарев е првиот кој направил рендгенографија на фотографска плоча на пациент заболен од рак. Тој е редок Македонец којшто со своето дело бил многу блиску до добивање на Нобеловата награда.