Претседателката Гордана Силјановска-Давкова во рамките на тридневната официјална посета на Словенија присуствуваше на богослужба во македонската православна црква „Свети Климент Охридски“ во Љубљана, кадешто изворно го слушна гласот на македонските иселеници.
„Во пријателска атмосфера, разговаравме за нивниот живот далеку од дома, за поврзаноста со татковината и за улогата на македонската традиција, јазик и култура во зачувувањето на македонскиот дух.
Членовите на Сојузот на македонските културни друштва и претставниците на црковните одбори ме запознаа со нивната работа и со напорите што ги вложуваат во негувањето и зачувувањето на македонскиот идентитет.
Преку фестивали, литературни и ликовни настани, фолклорни ансамбли и бројни културни проекти, тие им ја пренесуваат македонштината на младите генерации“, објави шефицата на македонската држава на социјалните мрежи.
Во Амбасадата на Македонија во Љубљана таа се сретна и со пратеничката во словенечкиот парламент од македонската заедница Сандра Газинковски.