Во Галичник денеска, на Петровден, се одржува традиционалната културна манифестација Галичка свадба 2026. И годинава се очекува голем интерес од посетители од земјава и странство кои сакаат да го доживеат уникатното свадбарско чествување исполнето со автентични обичаи, носии, изворни песни и ора.
Годинашни галички младоженци се Александар Пендароски и Мартина Михајлова. Интересно е што годинава се навршуваат точно 35 години од првата современа Галичка свадба одржана во 1991 година, кога биле венчани родителите на Александар. Со нивното учество, младите продолжуваат една силна семејна традиција.
„За мене ова не е само свадба, туку продолжување на една семејна приказна и врска со Галичник која трае со генерации. Особено сум горд што токму годинава, кога се одбележуваат 35 години од свадбата на моите родители, ќе имам можност и самиот да бидам галички младоженец“, изјави Александар Пендароски.
Неговата избраничка, Мартина Михајлова, рече дека Галичка свадба е чувство кое тешко може да се опише со зборови.
„Тоа е чест, одговорност и привилегија да се биде дел од традиција која опстојува со векови. Со нетрпение и огромна возбуда ги очекуваме моментите кога заедно со нашите семејства и сите гости ќе ја почувствуваме магијата на Галичник и на уникатните свадбарски обичаи“, истакна Михајлова.
Денеска ќе се одржат централните свадбарски обичаи: „канење на мртвите“, „канење на кумот“, „бричење на зетот“, „гледање низ прстен“, „тргнување по невеста“, дарувањето и останатите ритуали. Венчавањето ќе се изврши во црквата „Св. Петар и Павле“, по што следува традиционалното испраќање на тапанџиите и зурлаџиите.
Манифестацијата започна во петокот со културно-забавна програма, а вчера се одржаа главните подготвителни обичаи како „китење на ситото“ и „замесување на сваќата“.
Организатор е Месната заедница „Галичник“, а покровител е претседателката Гордана Сиљановска-Давкова. Манифестацијата се пренесува во живо преку видео-екран и социјалните мрежи, за да може да ја следат и оние кои не можат физички да присуствуваат.
Организаторите апелираат до посетителите да уживаат одговорно во празничната атмосфера и да ја зачуваат чистотата на Галичник.