Извршниот одбор на СДСМ денеска донесе одлука да почне постапка за исклучување од членство членот на Советот на Општина Карпош, заради непочитување на одлуките и ставовите на СДСМ и работење спротивно на интересите на партијата. Се работи за советникот Радослав Трошановски кои гласаше за избор на новиот претседател на Советот на општината.
- „Советникот гласаше за изборот на претседател на Советот во Карпош спротивно на партиските одлуки и ставови. Согласно Статутот на СДСМ, непочитување на одлуките, работење и гласање спротивно на интересите на СДСМ како и нанесување значителна штета на партијата повлекува одговорност, а тоа се однесува и на сите избрани советници. ИО на СДСМ најостро ги осудува сите притисоци, уцени и закани врз советниците во советите на општините на локално ниво од страна на ВМРО-ДПМНЕ, за што партијата ќе преземе соодветни мерки за нивна заштита“, соопшти партијата.
Нов претседател на Советот на Општина Карпош е Христо Саракинов од ВМРО-ДПМНЕ. Неговиот избор беше помогнат со гласовите на по еден советник од ГРОМ и од СДСМ, Зоран Краљевски и Радослав Трошановски
Од 27 советници во Општина Карпош, 12 се од коалицијата на ВМРО-ДПМНЕ и еден од ЗНАМ, а по четири имаат СДСМ, Левица и коалицијата „Искуство за успех“, во која членува и партијата ГРОМ. Тројца се независни.