Група студенти преку јавно обраќање до јавноста изразија сериозна загриженост поради, како што велат, нерамномерна примена на академските правила во рамките на истиот систем на високо образование.
Тие посочуваат дека според анализата на јавно достапните билтени на Универзитетот „Св. Кирил и Методиј“ во Скопје, во периодот од 2017 до 2026 година, на Факултетот за физичка култура, спорт и здравје се стекнати 27 академски степени (19 докторски и 8 магистерски) од кандидати кои претходно завршиле стручни студии (претежно физиотерапија).
„Особено внимание привлекува фактот дека 18 од 19 докторирани кандидати потекнуваат од Република Косово“, се наведува во писмото.
Студентите нагласуваат дека во македонскиот систем студиите по физиотерапија се организирани како стручни студии, што отвора сериозна дилема за начинот на кој дипломите од Косово биле нострифицирани и признати од Министерството за образование и наука, а потоа интегрирани во академскиот систем на УКИМ.
Тие посочуваат дека во повеќето европски држави кои го применуваат Болоњскиот систем, пристапот до повисок циклус студии се темели на вкупниот број на стекнати ЕКТС кредити, а не само на формалната поделба меѓу стручни и академски студии.
„Оваа појава не е изолиран случај. Неофицијални информации укажуваат дека слични академски патеки постојат и на други факултети и универзитети во државата“, велат студентите.
Во обраќањето се истакнува дека во исто време, дел од македонските студенти се соочуваат со правни и институционални спорови околу валидноста на нивните студии, додека на други факултети процесот на магистрирање и докторирање продолжува без прекин.
„Ова создава впечаток на нерамномерна примена на академските правила во рамките на истиот систем на високо образование“, се вели во писмото.
Групата студенти најавува дека во наредниот период ќе спроведат детална анализа на сите факултети и универзитети во државата, со цел Министерството за образование и наука да има целосен увид во функционирањето на академската вертикала.
„Потребна е сеопфатна, транспарентна и институционална анализа на примената на Болоњскиот систем во државата, со цел да се воспостави јасен и единствен стандард кој ќе важи за сите студенти, без разлика дали доаѓаат од Македонија или од странство. Само на тој начин може да се зачува академскиот интегритет на универзитетите и довербата на јавноста во академските титули“, се заклучува во обраќањето.