„Илир Демири, пратеник во Собранието од крилото на Алијансата за Албанците на Зијадин Села, денес потврди дека ќе продолжи да дејствува како независен пратеник во Собранието. Според него, целта на овој чекор е да се отвори патот за пофункционална реорганизација на албанската опозиција во земјата.“ – објави информативниот портал на албански јазик „Тетова сот“.
Порталот натаму наведува: „Извори од Собранието известуваат дека Демири официјално ја доставил документацијата за напуштање на пратеничката група и оти неговата иницијатива има за цел да создаде координиран опозициски блок. Според доставениот документ и парламентарните извори, се очекува на иницијативата да ѝ се придружат и други членови на албанската опозиција, кои го гледаат овој процес како можност за зголемување на политичката и институционалната тежина на опозицијата.“
„Овој потег се смета како движење со потенцијал да внесе нова динамика на политичката сцена и да создаде посилна рамнотежа кон сегашната влада. Во наредните денови се очекуваат и други случувања, вклучувајќи изјави и можни одлуки од пратениците за кои се очекува да се приклучат на овој процес.“ – тврди „Тетова сот“ во својата информација.