Со 14 одземени возила од почетокот на функционирањето на системот „Безбеден град“ во полн капацитет, територијата на Секторот за внатрешни работи Тетово е водечки меѓу осумте регионални полициски управи во Македонија.
Во периодот од 1 до 16 февруари, по налог на јавниот обвинител, 13 возила се одземени на територијата на СВР Велес, 12 на СВР Битола, по 11 во СВР Струмица и во СВР Куманово.
За малку повеќе од две недели полицијата заплени вкупно 90 возила низ целата земја, а најчеста причина е возењето без возачка дозвола, за што се смета кога возачот никогаш не полагал испит, кога му е трајно одземена дозволата или кога вози додека има привремена забрана.
Возилата се чуваат во полициски станици, а понатамошните постапки се во надлежност на Обвинителството и на судовите, објаснуваат од Министерството за внатрешни работи.
Најновите податоци покажуваат дека минатата недела имало намалување на бројот на сообраќајни прекршоци евидентирани од системот „Безбеден град“.