Денес е ден на демократијата, денес македонските граѓани ќе можат да си го остварат своето право на глас во рамки на едни мирни, фер и демократски избори да си ги изберат своите градоначалници и советнички листи кои во иднина ќе треба да ги менаџираат единиците на локалните самоуправа, изјави утринава министерот за внатарешни работи Панче Тошковски откако го оствари своето право на глас.
Тошковски истакна дека гласањето е започнато на сите избирачки места во Македонија.
-Имаме мирна, демократска и фер изборна атмосфера. Очекувам таа да продолжи. Ги повикувам сите македонски граѓани да го остварат своето право на глас, да ги дефинираат чекорите во иднина како ќе треба да се развива Македонија на локално ниво, се со цел да креираме иднина каква заслужуваат нашите граѓани. Денеска активирани се над 90 проценти од силите на МВР, фокусирани сме на спроведување на еден мирен изборен процес, ги превземаме сите дејствија, нагласи министерот за внатрешни работи.
Потенцираше дека полицијата е на терен, распоредена насекаде и ги контролира утврдените таканаречени жешки точки.
-Вчера имаме констатирано четири настани каде има потенцијално нарушување на изборниот молк, конкретно поврзани со одредени незаконити постапки. Постапуваме по тоа, додаде Тошковски.
Полицијата ќе ги обезбедува гласачките места непрекинато почнувајќи од 6:00 часот до 19:00 часот за времетраењето на гласањето, по затворањето на гласачкото место и за време на сумирањето на резултатите и ќе ги отстранува сите неовластени лица од објектот.
Полицијата го обезбедува избирачкиот одбор до предавање на записникот и изборниот материјал на општинската изборна комисија, односно Изборната комисија на градот Скопје.