Администрацијата на американскиот претседател Доналд Трамп разрешува 30 кариерни дипломати од амбасадорски и други амбасадски позиции.
Меѓу нив е и амбасадорката од Македонија Ангела Агелер.
Овој потег доаѓа како дел од напорите за преобликување на американските дипломатски мисии и назначување персонал кој се смета за поусогласен со приоритетите на Трамп „Америка на прво место“.
Шефовите на мисии во најмалку 29 земји биле известени минатата недела дека нивните задачи ќе завршат во јануари, изјавија двајца претставници на Стејт департментот, зборувајќи под услов на анонимност. Оние кои се погодени од промените нема да ги изгубат своите работни места во надворешната служба и ќе се вратат во Вашингтон на други задачи доколку одлучат да ги прифатат, изјавија претставниците.
Сите амбасадори кои се отповикани ја презедоа функцијата за време на администрацијата на претседателот Џо Бајден, но останаа на своите позиции по почетната чистка на почетокот на вториот мандат на Трамп во јануари, која беше насочена претежно кон политички назначени лица. Тоа се промени минатата среда кога почнале да добиваат известувања од Вашингтон дека треба да заминат.
Стејт департментот не коментираше за конкретниот број на засегнати вработени или амбасадори, но рече дека тоа е стандарден процес во секоја администрација. Амбасадорот, како што се вели, е „личен претставник на претседателот и право на претседателот е да обезбеди дека има поединци во овие земји кои ја промовираат неговата агенда „Америка на прво место“.
Африка е најтешко погодена од промените, при што амбасадорите од 13 земји се отповикани – Бурунди, Камерун, Зелен ’Рт, Габон, Брегот на Слоновата Коска, Мадагаскар, Маврициус, Нигер, Нигерија, Руанда, Сенегал, Сомалија и Уганда.
Азија е на второ место со промени на амбасадори во шест земји – Фиџи, Лаос, Маршалски Острови, Папуа Нова Гвинеја, Филипини и Виетнам.
Во Европа, промени се случија во Ерменија, Македонија, Црна Гора и Словачка.
На Блискиот Исток, во две земји – Алжир и Египет, како и во Јужна и Централна Азија – во Непал и Шри Ланка) и на Западната хемисфера – во Гватемала и Суринам.
Незгодни детали и информации од Вашингтон за Скопје и други 29 светски градови