Турската полиција во само десет дена уапси 429 лица во масовни операции против кибер-криминалот низ целата земја, објави министерот за внатрешни работи Али Јерликаја.
Во првиот бран (последни 10 дена) приведени се 354 осомничени во 35 провинции, додека вчера наутро во Истанбул и уште 14 градови паднаа дополнителни 75 лица. Запленети се 16 фирми, 13 домови, 37 автомобили, 14 станови, 13 земјишни парцели, 447 банкарски сметки и огромна количина накит и луксузни предмети – вкупна вредност над 1,05 милијарди турски лири (околу 20,3 милиони евра).
Осомничените се обвинети за дистрибуција на детска порнографија, масовни онлајн измами (лажни хотелски резервации, продажба на недвижности, кредити со ниска камата) и промоција на нелегално коцкање преку социјални мрежи и лажни веб-страници.
„Со овие операции спречивме огромна материјална и емоционална штета врз нашите граѓани“, порача Јерликаја.