Енергетските компании во регионите Харков и Запорожје добија енергетски трансформатори од македонскиот прозиводтел „Раде Кончар“, префрлени од магацините на центарот за итна помош на Министерството за енергетика на Украина.
„Трансформаторите ќе помогнат во обновата на оштетените објекти и за одржување стабилно функционирање на енергетската инфраструктура во регионите кои систематски се цел на руски напади. Опремата ќе се користи за обнова и поддршка на функционирањето на енергетската инфраструктура во регионите кои редовно се нападнати од Русија“, соопшти Министерството за енергетика на Украина, кое изрази благодарност до Македонија и до „Раде Кончар“ за поддршката на енергетскиот сектор на Украина и за солидарноста со Украина.
Македонија, исто така, обезбеди поддршка за медицинската инфраструктура. Амбасадата на Украина во Скопје, заедно со претставници на меѓународниот дипломатски кор и организацијата „Каритас“, му донираше дизел генератор „Раде Кончар“ од 35 киловати на Националниот институт за кардиоваскуларна хирургија „Микола Амосов“.
Генераторот е купен со средства донирани од странски дипломати акредитирани во Македонија. Опремата е наменета да обезбеди резервна енергија за институцијата во случај на прекини во снабдувањето со електрична енергија.