Во касарната „Гоце Делчев“ во Скопје, каде што е сместена Воената академија „Генерал Михаило Апостолски“, денеска ќе се одржи свечена промоција на питомците од 26. класа, кои ќе бидат произведени во чин потпоручник, како и на слушателите што успешно го завршиле курсот за офицери и ќе го добијат чинот поручник.
Според најавата од Министерството за одбрана, пред присутните ќе се обратат министерот за одбрана Владо Мисајловски и деканот на Воената академија, полковник Ненад Танески.
На свеченоста се очекува да присуствуваат и началникот на Генералштабот на Армијата, генерал-мајор Сашко Лафчиски, министрите Борко Ристовски и Стефан Андоновски, командантот на Командата за обука и доктрини, бригаден генерал Лулзим Нуредини, претставници на воено-дипломатскиот кор од Босна и Херцеговина и Црна Гора, како и претставници на локалната самоуправа и други гости од Министерството за одбрана и Армијата.