Бобан Утковски, директор на Истражниот затвор „Скопје“ во Шуто Оризари, останува на ставот дека институцијата што ја раководи може(ше) да ја гарантира безбедноста на Артан Груби како и на секој друг.
„Затворот ‘Скопје’ во Шуто Оризари не е мексикански картел. Може да ја гарантира безбедноста на секој штитеник, па дури и на поранешниот вицепремиер“, изјави Утковски за „Слободен печат“. „Безбедноста овде е на прво место. Од мене не е побарано писмено да се произнесам за безбедноста на лицето Артан Груби. За МВР и АНБ не знам. За мене сето ова е произволно. Нека дојде кој сака и да каже кои параметри не ги задоволува затворот „Скопје“. Кои се тие безбедносни критериуми што ние не ги исполнуваме“.
„Со сиот свој интегритет гарантирам дека максимално е загарантирана безбедноста на секој штитеник, дури и на Груби. На крајот на краиштата, ако толку ценат дека овде е небезбедно, има и други притворски одделенија и во затворите во Гевгелија, Битола и во Куманово“, додаде тој.