Денеска сме на Водно, на улица Партение Зографски 31, каде што жителите алармираат дека се копа и се гради во непосредна близина на главната водоводна цевка. Стравуваат дека градежните активности може да предизвикаат сериозни оштетувања и проблеми со водоснабдувањето, изјави Клементина Брзаковска, член на ГК Скопје и претседател на Комисија за животна средина на ОК Центар.
- „Според жителите, проблемот повеќепати бил пријавуван во Општина Центар, но надлежните не излегле на терен. Господине Герасимовски, колку пријави треба да поднесат граѓаните за конечно да реагирате? Дали треба да настане штета, па потоа да преземете нешто? Јавно прашуваме: Дали е точно дека Општина Центар во моментов има еден градежен инспектор, кој е на боледување, додека останатите ја напуштиле работата? Дали причината за нивното заминување се евентуалните притисоци и од кого? Господине Филипче, господине Горан Бетон Герасимовски, ве повикуваме да дојдете на оваа локација, да разговарате со жителите и да објасните кој ја контролира изградбата и кој ја гарантира безбедноста на водоводната инфраструктура.
- Господине Филипче, ве повикуваме заедно со Горан Бетон Герасимовски симболично да ги вадиме тулите од овој објект, за кој жителите сметаат дека е спротивен на нивните интереси. Ветувавте хумана урбанизација, а денес граѓаните бараат одговори и конкретни дела“, кажа таа.
Таа нагласи дека станува збор за прашање што директно ги засега безбедноста, квалитетот на живот и иднината на Центар, поради што побара итна реакција од надлежните институции.
- „Почитувани, За нас ова е прашање на безбедноста, квалитетот на живот и иднината на Центар. Бараме итен инспекциски надзор, проверка на водоводната инфраструктура и јавно објавување на наодите. Филипче и Горан Бетон Герасимовски, доста се ветувања! Граѓаните заслужуваат одговори, а не изговори! Центар им припаѓа на граѓаните, а не на бетонот и инвеститорските интереси“, рече Брзаковска