Паркови, зеленило, повеќе паркинг места во општините очекуваат од градочалниците, затворениците кои гласаат денеска. Материјалот за гласање синоќа пристигнал, а утрото точно во седум часот без никакви проблеми почнало гласањето. За гласање во најголемиот затвор во Македонија – Идризово се пријавени 1085 избирачи, а во затворот вкупно има 1281 осуденици. Разликата во гласачите е поради разликата на затвореници кои влегле или излегле од затворските ќелии откако бил затворен избирачкиот список, велат од затворот. Почитувајќи ги насоките на затворските полицајци, затворениците еден по еден го остваруваа своето избирачко право.
Од избирачката комисија во затворот во Идризово велат дека до 11 часот излезноста била околу 12 проценти.
И во притворот во Шутка гласањето почнало навремено и тече во нормален ред, а според избирачкиот список право на глас имаат 411 притвореници и осуденици. Според информациите од затворот, излезноста до напладне била околу 40 проценти. Исто како и во најголемиот затвор во Македонија, така и во Шутка, штитениците се спроведуваат по претходно утврден редослед и затворската полциија се грижи гласањето за нови локални самоуправи да тече без никаков застој. Гласањето завршува во 19 часот за кога е предвидено затворање на избирачките кутии. Потоа избирачкиот материјал со придружба од полицијата се доставува до општините од каде доаѓаат затворениците,а потоа и до избирачките места.