Не се чекаше долго за првата реакција во Бугарија по иницијативата од ВМРО-ДПМНЕ за промена на законот за избор на пратеници, според која народен избраник ќе може да стане лице само со македонско државјанство.
„Критичарите на предлогот се категорични дека таквата мерка би била контроверзна и потенцијално дискриминаторска. Според нив, двојното државјанство е честа појава во регионот и во Европа како целина, а ограничувањето на правото на учество во парламентот врз основа на ова би влијаело врз значителен број граѓани, вклучувајќи и лица со бугарски пасоши.
Претставниците на опозицијата и правните експерти предупредуваат дека таквата промена би можела да биде спротивна на основните демократски принципи, вклучително и еднаквоста во учеството на изборите. Тие нагласуваат дека политичките права не треба да се ограничуваат само врз основа на државјанството, особено кога станува збор за луѓе кои всушност живеат и учествуваат во јавниот живот на земјата“, коментира бугарскиот портал „Таралеж“.
„Ако предлогот и официјално биде доставен до парламентот, се очекува да предизвика сериозни политички судири меѓу владејачките и опозициските партии. Аналитичарите забележуваат дека темата за двојно државјанство е особено чувствителна во Северна Македонија и често е испреплетена со пошироки прашања за идентитетот, односите со соседните земји и процесот на европска интеграција.
Се очекува и силен јавен одговор, бидејќи таквото ограничување би можело да влијае на различни групи граѓани, вклучително и оние со бугарско државјанство, кои во исто време имаат право да учествуваат во политичкиот живот на земјата“, се заклучува во написот насловен „Северна Македонија со ново ограничување: Ако сте бугарски државјанин, не можете да бидете пратеник“.
Од друга страна, и Бугарија има ограничувања за учество на изборите на лицата со двојно државјанство, што на последните парламентарни избори на своја кожа го почувствува Зоран Мрсески, кој беше кандидиран од ултранационалистичката партија Преродба.
Бугарската Централна изборна комисија (ЦИК) ја избриша неговата регистрација поради тоа што моменталната адреса на Мрсески е во Македонија.
Бугарскиот Устав дозволува лице со двојно државјанство да биде избрано за пратеник, но под услов да живеело во Бугарија во последните 18 месеци.