Родителите од Кочани информираат дека ја добиле одлуката за спомен-обележјето „Патека на бесконечноста“, посветено на 63-те ангели.
Како што велат, советот на Општина Кочани, на седницата одржана на 30 јануари 2026 година, донесе официјална Одлука за изведување на спомен-обележјето под името „Патека на бесконечноста за 63-те ангели“.
Овој проект е посветен на жртвите кои трагично загинаа во пожарот во дискотеката „Пулс“.
Според усвоената документација, спомен-обележјето ќе се простира на вкупна површина од 1.053 квадратни метри. Локацијата е прецизирана на дел од катастарската парцела бр. 12179 КО Кочани, сместена помеѓу улиците „Кеј на револуцијата“ и „Браќа Ставреви“. Проектот предвидува максимална висина на обележјето до три метри.
„Ова за нас претставува голем и значаен чекор напред. Во наредниот период продолжуваме со обезбедување на останатите потребни документи, како и со финансиска поддршка од фирми и од физички лица, но и преку спортски и хуманитарни настани кои веќе се одржаа, како и оние кои во иднина ќе се одржуваат со исклучиво хуманитарна цел“, велат родителите.
Тие изразуваат огромна благодарност до Советот на Општина Кочани, како и до граѓаните на Општина Кочани, за нивната максимална поддршка, солидарност и човечност во овие тешки моменти.
„Се надеваме и веруваме дека „Патеката на бесконечноста“ ќе биде изградена во најкраток можен рок, како траен спомен, тивка болка и вечно сеќавање на оние кои прерано нè напуштија“, додаваат од таму.