Инспекциските служби на Агенцијата за храна и ветеринарство (АХВ) на граничниот премин Блац, минатата недела спречија увоз на две пратки УХТ млекоо д Косово со вкупна тежина од 27.520 литри, поради утврдено присуство на афлатоксин над најмногу дозволените концентрации, одредени со постојните законски прописи.
Небезбедните количини млеко, кои биле наменети за пласман во верига на маркети во земјава, минатата недела под надзор на официјален ветеринар, нештетно се уништени на депонијата Дрисла.
Мострите за лабораториско тестирање на двете небезбедни пратки УХТ млеко, земени се во рамки на Мониторинг програмата која инспекциските служби на АХВ на граничен премин ја реализираат за пратките со храна од животинско потекло кои се увезуваат во земјава.
На 17 јули годинава Агенцијата донесе и Решение за воведување на посебни безбедносни мерки при увоз на млеко, производи од млеко, како и производи кои содржат згуснато млеко и млеко во прав со кои ги засили официјалните контроли при увоз на овој тип производи од животинско потекло преку вршење на задолжителни лабораториски испитувања и проверки на усогласеноста со барањата за квалитет, со цел на домашниот пазар да се пласираат исклучиво безбедни и квалитетни производи и да се обезбеди фер конкуренција и заштита на домашните производители и потрошувачите.
„Нетпрес“