Хисни Гуцати во интервју за Газета Блиц ја откри локацијата на следниот протест по оној, најавен во Стразбур. Тој рече дека последниот протест за оваа година ќе се одржи во декември, а локацијата ќе биде, како што вели, „Скопје на Албанците“. Ова го објави информативниот портал на албански јазик „Актуале“.
Натаму порталот наведува: „Следната локација по изборите во Македонија ќе биде Скопје на Албанците. Последниот протест за оваа година ќе биде во декември. Нема да бидеме причина некој утре да ни каже дека здруженијата на војниците на УЧК дошле во Скопје и оти направиле погрешен потег. Не, ќе одржиме мирен протест во Македонија, бидејќи таму ги имаме нашите браќа Албанци.“ – изјави Гуцати. Организацијата на ветерани на Ослободителната војска на Косово одржа протести во Приштина, Хаг, а неодамна и во Тирана. – објави „Актуале“.
Инаку, на самиот финиш на предизборната кампања за локалните избори во Македонија, на два дена пред да се одржи првиот круг на гласањето, лидерот на ДУИ Али Ахмети ненадејно ги напушти предизборните карвани на коалицијата Национална алијанса за интеграција, предводена од ДУИ и реши да присуствува на 17 октомври на протестот во Тирана во знак на „поддршка на четворицата поранешни команданти на косовската УЧК“, на кои им се суди во Хашкиот трибунал за „воени злосторства против цивилно население“ во 90-тите години од минатиот век во Косово.
Во колумната со наслов „Карневалскиот протест во Тирана и Хаг“,која ја објави неодамна весникот на албански јазик „Лајм“ од Скопје, косовскиот публицист Идриз Зеќирај ги нападна со невидена жестина организаторите на „протестниот митинг за правда за водачите на косовската УЧК“ во Тирана, покрај другото, нагласувајќи: „Се Случи тоа лидери и експоненти на здруженија на УЧК и некои фантомски здруженија, наводно ’излезени од војната’, со поддршка на официјална Тирана повикаат на протест против Специјалниот суд за Косово, со седиште во Хаг! Еди Рама, албанскиот премиер-манипулатор треба да ги остави демагогијата и лажниот патриотизам. Дури, никаков патриотизам не е да го криеш со него својот криминал! Национален срам беше карневалскиот протест на плоштадот ’Скендербег‘ во Тирана. Некои криминални ‘божем команданти’, кои учествуваа на тој протест, го растурија системот на правдата, со цел да ги одбегнат одговорноста и полагањето сметки за нивните сериски криминали“.
А токму Али Ахмети беше еден од главните говорници на овој митинг на плоштадот „Скендербег“ во Тирана. Токму Ахмети им упати повик на Албанците од Македонија тогаш да присуствуваат колку што е можно помасовно на митингот во Тирана. Што значи, жестоките критики на Зеќирај, покрај другите, се однесуваа и на Али Ахмети и на неговиот „албански патриотизам“. Останува да се види дали и како ќе настапи Али Ахмети и на најавениот декемвриски „мирен протест“ во Скопје.