Украинскиот претседател објави дека ќе има промени на врвот на најважните енергетски компании во земјата, кои беа потресени од голем корупциски скандал, објави ДПА.
Воени профитери: Вреќи полни со пари, златен тоалет, раскошни станови…
„Заедно со темелна финансиска ревизија, мора да почнеме и да го обновуваме управувањето со овие компании“, напиша украинскиот лидер на Телеграм.
Тој истакна дека ги координирал своите активности со премиерката Јулија Свириденко.
Условите за формирање нов надзорен одбор во државната нуклеарна компанија „Енергоатом“ мора да се исполнат во рок од една недела, нагласи Зеленски, додавајќи дека и извршниот одбор на компанијата ќе биде целосно заменет.
Ќе има промени и во управувањето со државниот оператор на хидроелектраната „Укрхидроенерго“, операторот на гасоводниот систем во Украина и државниот енергетски гигант „Нафтогаз“, наведе Зеленски.
„Енергоатом“ е во центарот на најголемиот корупциски скандал во Украина откако започна руската инвазија во февруари 2022 година.
Националното биро за борба против корупцијата на Украина и Специјализираното обвинителство за борба против корупцијата објавија дека истражуваат голема корупциска шема поврзана со „Енергоатом“ во која се испрани речиси 100 милиони долари.
Истрагите се фокусираат на огромни поткупи наводно платени за изградба на одбранбени објекти дизајнирани да ги заштитат енергетските објекти од руските воздушни напади.
Двајца министри поднесоа оставки откако избувна скандалот, а двајца осомничени, меѓу кои и еден од блиските соработници на Зеленски, избегаа во странство.