Андреј Жерновски, човекот кој не избламира пред земја-членка на ЕУ и никогаш не стана амбасадор, не може да зборува за дипломатија, реагираше денеска од ВМРО-ДПМНЕ на ставовите што ги изнесе Жерновски, член на Извршниот одбор на СДСМ, кој го обвини министерот за надворешни работи Тимчо Муцунски за тотален дебакл во надворешната политика и за влошена меѓународна позиција.
„Жерновски кој седеше со месеци во Букурешт без да предаде акредитивни писма, слуга на Заев не може да кажува како треба да се работи. Жерновски е уште еден потрчко на патлиџан дипломатијата на Заев, кои ја сфаќаа дипломатијата како ,’Бојко љубави, имаш поздрави од Зоки’. Жерновски глуми дипломат, а всушност се работи за човек кој е следбеник на дипломатијата ‘еден народ, две држави’“, се наведува во соопштението од ВМРО-ДПМНЕ.
„СДСм пред да зборува за дипломатија, треба да се извини за Заев, и за сите уназадувања кои ги причини тој, на национален план. СДС ги урна Македонските позиции, нешто кое наиде на фрапираност и кај најголемите шовинистички кругови во Бугарија. СДС е директно виновен за се негативно на дипломатски план. А Владата на ВМРО-ДПМНЕ, веќе една година поправа грешки од СДС и ниже успеси“, велат од владејачката партија.
Според Андреј Жерновски, член на Извршниот одбор на партијата, по една година владеење, резултатите на меѓународен план се поразителни, а Македонија е „понижена, без ниту еден успех, само порази“.