По повод Светскиот ден на лебот, Жито Лукс и оваа година ја продолжува традиционалната хуманитарна акција во соработка со Црвениот крст на Република Северна Македонија.
Во периодот од 14 до 20 октомври, компанијата ќе донира вкупно 8.000 лебови за граѓаните и семејствата на кои поддршката им е најпотребна.
Донацијата ќе биде распределена преку регионалните центри на Црвениот крст низ државата, со цел да стигне до најранливите категории граѓани и да придонесе во обезбедувањето на нивните секојдневни оброци.
Иницијативата традиционално се реализира по повод Светскиот ден на лебот, кој се одбележува на 16 октомври и потсетува на значењето на една од основните прехранбени намирници, но и на фактот дека за многу луѓе обезбедувањето на основните производи сè уште претставува секојдневен предизвик.
Лебот отсекогаш имал посебно место во животот на луѓето. Низ историјата бил основна храна, но и симбол на благосостојба, споделување и заедништво.
Во македонската традиција и денес е неизоставен дел од семејната трпеза, присутен во секојдневните оброци, но и во бројни обичаи и семејни прослави.
„Лебот е дел од нашата традиција, од нашето секојдневие и од речиси секоја семејна трпеза. Низ генерациите тој ја задржал својата вредност како основен прехранбен производ, но и како симбол на грижа, споделување и заедништво. За нас во Жито Лукс, компанија која годинава одбележува 80 години постоење, оваа поврзаност со луѓето има особено значење. Веруваме дека нашата одговорност не завршува со производството на квалитетен леб, туку продолжува и преку поддршката што ја даваме на заедницата. Со оваа традиционална донација сакаме да покажеме дека и малите, секојдневни нешта можат да направат голема разлика во нечиј живот“, изјави Стефанија Ракиќ, директор за човечки ресурси и комуникации во Жито Лукс.
Од Црвениот крст ја истакнуваат важноста на континуираната соработка со компаниите кои преку конкретни активности придонесуваат за поддршка на ранливите категории граѓани.
„За многу семејства со кои работиме, обезбедувањето на основните прехранбени производи претставува секојдневен предизвик. Токму затоа, ваквите донации имаат големо значење, бидејќи овозможуваат конкретна и навремена помош за луѓето на кои им е најпотребна. Ја поздравуваме долгогодишната поддршка од Жито Лукс и нивната посветеност на хуманоста и солидарноста. Ваквите партнерства покажуваат дека со заедничко дејствување можеме да придонесеме за подобро секојдневие на нашите сограѓани“, изјавија од Црвениот крст на Република Северна Македонија.
Со оваа иницијатива, Жито Лукс уште еднаш ја потврдува својата посветеност на општествената одговорност и грижата за заедницата, продолжувајќи ја традицијата на дарување и солидарност. Во годината кога одбележува осум децении постоење, компанијата потсетува дека вредноста на лебот не е само во неговото место на трпезата, туку и во можноста да се сподели со оние на кои им е најпотребен.
