Непосредно пред почетокот на закажаната вонредна седница на Народното собрание на Република Српска, во зградата била добиена дојава за поставена бомба, објавија медиумите од Република Српска. Поради ова, сите присутни во објектот биле евакуирани.
Моментално се врши контрасаботажна проверка за да се утврди безбедноста на зградата. Седницата, првично закажана за 10:00 часот наутро, е одложена за 11:30 часот поради дојавата.
На дневниот ред на седницата беа предвидени четири клучни точки:
-
Прифаќање на оставката на премиерот на Република Српска.
-
Информација за пресудата на Судот на Босна и Херцеговина изречена против претседателот на Република Српска, Милорад Додик, како и одлуката на Централната изборна комисија на Босна и Херцеговина за престанок на неговиот мандат, заедно со ставот на Народното собрание за идните активности на институциите на Република Српска.
-
Предлог за измени и дополнувања на Законот за референдум и граѓанска иницијатива, по итна постапка.
-
Разгледување и усвојување на одлука за распишување референдум во врска со одлуките на Судот на Босна и Херцеговина и Централната изборна комисија за престанок на мандатот на претседателот Милорад Додик.