Вкупно 625 американски војници пристигнуваат на аеродромот во Варна, објави Министерството за одбрана, јавуваат тамошни медиуми.
Оттаму, тие ќе бидат транспортирани до заедничкиот бугарско-американски објект на полигонот за обука Ново Село.
Причината е што од 8 до 12 април ќе се одржи планирана ротација на персонал од американскиот контингент кој извршува задачи во рамките на иницијативата за обезбедување безбедност „Атлантска решителност“.
„Атлантска решителност“ е иницијатива на американската армија во Европа и Африка, која има за цел да го зајакне одвраќањето, да ја зголеми подготвеноста на НАТО и да ја подобри интеракцијата меѓу американските сили и сојузниците во Источна Европа.
Иницијативата вклучува американски формации кои учествуваат во билатерални, заеднички или мултинационални вежби во балтичките земји, Полска, Романија и Бугарија на ротациона основа.
Министерството за одбрана на Бугарија наведува дека движењето на персоналот и придружната опрема од аеродромот во Варна до полигонот за обука Ново Село ќе се врши по републиканската патна мрежа. За време на транспортот, можно е да поминат колони со воена опрема, придружувани од тимови на Воената полиција.
Министерството апелира до граѓаните и возачите да покажат разбирање и да ги следат упатствата на органите за спроведување на законот при средбите со воените колони, со цел да се обезбеди безбедноста во сообраќајот.