Лидерот на бугарската партија „Преродба“ (Възраждане), Костадин Костадинов, во видеообраќање објавено на социјалните мрежи отворено изјави дека Бугарија во периодот на Втората светска војна имала фашистичка власт.
Држејќи историска фотографија, Костадинов објасни дека слични снимки биле масовно распространувани и поставувани на агитациски табли низ бугарските села и градови, со цел да се покаже „што ги чека непријателите на царска Бугарија“ и „непријателите на фашистичката власт“.
„Затоа што да, Бугарија имаше фашистичка власт. Колку и денешните ревизионисти да се обидуваат да кажат дека тоа не бил класичен фашизам, туку авторитаризам и така натаму… Како сакате наречете го, драги ревизионисти и фалсификатори – ние Бугарите знаеме дека тоа е фашизам“, изјави Костадинов.
Со оваа изјава, лидерот на една од највидливите националистички партии во Бугарија директно противречи на наративите кои често се промовираат од одредени бугарски политички и историски кругови, според кои режимот на цар Борис III и владата во тој период не биле фашистички.
Видеото предизвика значаен интерес на социјалните мрежи, особено во Македонија, каде што историските толкувања за улогата на Бугарија во Втората светска војна и окупацијата на македонските територии остануваат чувствителна и контроверзна тема.
Оф оф оф дури и Костадин Костадинов признава дека во втората светска војна Бугарија била фашистичка 😁😁😁 https://t.co/s0k1LbfP1t
— Mitre Kalabalak (@5891kripta) October 15, 2026