Зимските центри во регионот Копаоник во Србија и Пампорово во Бугарија на последниот ден од календарското лето го добија првиот снег како последица на силниот арктички бран што го зафати Балканот.
Во 15 часот на Копаоник беше измерена температура од 1 степен над нулата со умерен снег, поради кој сообраќајот беше забавен на сите приоди кон планината.
Претпладнето во Пампорово накратко дождот премина во слаб снег, кој не успеа да формира бела покривка поради температурата од 4 Целзиусови степени.
Покрај во двете популарни зимски дестинации, во Србија денеска паднаа први снегулки и на планината Голија, а во Бугарија на повисоките врвови на Рила.