Претседателот на Србија, Александар Вучиќ, денеска во своето обраќање го коментираше оштетувањето на српската амбасада во Техеран за време на американско-израелските напади врз Иран.
„Амбасадата е оштетена – цел на нападот беше базата Басидж. Шрапнели ја погодиле нашата амбасада. Важно е да кажеме дека нашите луѓе се повлекуваат кон Баку и Азербејџан, документацијата е уништена и целосно запалена, во согласност со правилата. Нашиот амбасадор ќе замине во Баку со луѓето од дипломатското претставништво, но на лично инсистирање ќе се врати во Техеран – таму имаме еден брачен пар со сурогат бебе и сакаме да направиме сè што можеме за да им помогнеме“, рече Вучиќ.
Тој додаде дека Србија ги подготвила авионите на Ер Србија за евентуална евакуација на граѓаните, но изрази разочарување од ситуацијата.
„Ние ги подготвивме авионите на Ер Србија, и тоа ме погодува, затоа што така и за време на короната им зборувавме на луѓето да не одат на Бали, па моравме на трошок на граѓаните на Србија да испраќаме авиони за да ги враќаме“, нагласи тој.
Вучиќ истакна дека приоритет е безбедноста на српските граѓани и дипломатскиот персонал, а амбасадорот ќе се врати во Техеран за да помогне во конкретниот случај со брачниот пар и бебето.
Ова е дел од пошироките мерки што Србија ги презема по ескалацијата на Блискиот Исток, каде што повеќе земји веќе организираат евакуации и привремени преселби на дипломатските мисии.