Поранешниот српски претседател Александар Вучиќ оцени дека светот се движи кон голем воен судир и дека Третата светска војна е неизбежна. Причината, според него, е забрзаното вооружување на европските земји.
Во интервју со руската новинарка Ксенија Собчак, Вучиќ предупреди на зголемувањето на воените расходи низ Европа, вклучително и во скандинавските земји, кои истовремено ги зајакнуваат своите воени капацитети.
Како пример го посочи германскиот одбранбен концерн „Рајнметал“, чија добивка, според неговите тврдења, се зголемила 17 пати поради зголемената побарувачка за воена опрема.
„Не сум ниту будала ниту слеп. Ако не гледате како се вооружува Европа, тогаш намерно го игнорирате тоа. Но, зошто се вооружуваат? Со која цел?“, праша Вучиќ.
Тој ја спореди актуелната ситуација со книжевното правило познато како „Чеховљевата пушка“, според кое оружјето што се појавува на почетокот на драмата на крајот мора да биде употребено.
Според него, истата логика би можела да се примени и на Европа, каде што натрупувањето оружје би можело да заврши со вооружен конфликт.
Вучиќ посочи дека европските влади продолжуваат да ги зајакнуваат своите вооружени сили, а зголемените трошоци за одбрана ги образложуваат со потребата од заштита од Русија.
Поранешниот српски претседател изрази песимизам во однос на меѓународната безбедносна ситуација, оценувајќи дека подготовките за поголема војна стануваат сè поочигледни.