Претседателот на Србија, Александар Вучиќ, остро реагираше на повлекувањето на Џаред Кушнер од проектот за изградба на луксузен Трамп комплекс на местото на бомбардираниот Генералштаб во Белград, нарекувајќи го „голем губитник“ за земјата.
„Сè што се случи во врска со Генералштабот, се гордеам со сите што учествуваа во обидот да се донесе толку голем инвеститор, а со кампањата и ловот што се водеше против инвеститорот успеавме да го уништиме сето тоа“, рече Вучиќ.
Тој додаде дека штетата е огромна: „Изгубивме инвестиција од 750 милиони евра, а блокадите ни предизвикаа штета од вкупно една и пол милијарда. Сега ќе имаме срушена зграда од која паѓаат тули, а никој веќе нема да ја допре“.
Вучиќ најави кривични пријави против сите вклучени во „потерата“ против инвестицијата, вклучително од обвинителството и полицијата. Тој го критикуваше и Обвинителството за организиран криминал, кое вчера поднесе обвинение против министерот за култура Никола Селаковиќ и уште три лица за злоупотреба на службена положба и фалсификување документи.
„Ние Србите сме мајстори за пропуштени можности, само за да му умре кравата на нашиот сосед на кој било начин“, рече Вучиќ, коментирајќи го соопштението на Кушнер дека се повлекуваат „за да не се подели народот“.
Проектот предизвика масовни протести поради страв од корупција и уништување на културно наследство.