Александар Вулин, претседател на Движењето на социјалистите и претседател на Надзорниот одбор на „Србијагас“, денеска потврди дека пристигнал во Москва. Тој објави видео на Instagram со порака „Стигнав во Москва“ и категорично ги отфрли тврдењата дека избегал од Србија.
Вулин изјави дека во руската престолнина ќе има серија средби посветени на продолжување на гасниот аранжман меѓу Србија и Русија. Тој нагласи дека не би заминал никаде без своето семејство и остро ги нападна медиумите и лицата кои објавија дека авионот во кој се наоѓал бил вратен во Белград затоа што тој не ја почитувал безбедносната процедура.
Потсетуваме, авионот на Air Serbia што синоќа (3 ноември) полета кон Москва беше вратен во Белград поради дополнителни безбедносни проверки поврзани со еден патник. Летот пристигна во Москва денеска со околу седум часа задоцнување. Меѓу патниците беа Вулин, директорот на „Србијагас“ Душан Бајатовиќ и министерот без ресор Ненад Поповиќ.
Според неофицијални информации, авионот бил ставен во процедура што се применува при сценарио на „бомбашка закана“. Вулин ги негираше овие наводи и инсистираше дека целосно ги поминал безбедносните контроли.
Тој порача дека целта на патувањето е исклучиво службена – обезбедување продолжување на гасниот аранжман од кој, како што рече, зависи снабдувањето на Србија.
View this post on Instagram